Կանոնադրություն

1. Ընդհանուր դրույթներ

1.1 <<Արդարություն>> կուսակցությունը (այսուհետ Կուսակցություն, հապավումը ԱԿ) ՀՀ Սահմանադրության և օրենքների շրջանակներում գործող, ինքնակառավարվող, ՀՀ Քաղաքացիների կամավորության սկզբունքով միավորված քաղաքական կազմակերպություն (Կուսակցություն) է:

1.2 Կուսակցության սկզբունքներն են՝

• Արդարությունը՝ որպես հնարավորությունների հավասարություն,
• Բարոյականությունը՝ որպես ցանկացած բնույթի գործունեության չափանիշ,
• Օրինականությունը՝ որպես քաղաքակիրթ հասարակության կայացման երաշխիք,
• Ժողովրդավարությունը՝ որպես բազմակարծության և խոսքի ազատության գրավական,
• Ազատությունը՝ որպես հասարակական կյանքի բոլոր ոլորտների զարգացման նախապայման,
• Ներսերնդային և միջսերնդային Համերաշխությունը,
• Քաղաքական և հասարակական Կայունությունը,
• Առաջընթացը՝ որպես համազգային բարեկեցության հասնելու միջոց:

1.3 Կուսակցության կառույցները գործում են կոլեգիալության և հրապարակայնության սկզբունքով:

1.4 Իր ծրագրային խնդիրներն իրագործելու նպատակով մասնակցում է ընտրություններին, օգտագործում է ՀՀ Սահմանադրությամբ նախատեսված քաղաքական պայքարի բոլոր ձևերը, օգտվում է զանգվածային լրատվության միջոցներից, համագործակցում պետական մարմինների, կուսակցությունների, հասարակական այլ կազմակերպությունների և անհատների հետ:

1.5 Կուսակցության անվանումն է՝ <<Արդարություն>> կուսակցություն, հապավումը ԱԿ:

1.6 Կուսակցությունը կարող է ունենալ խորհրդանշան, որը հաստատվում է Կուսակցության մշտապես գործող ղեկավար մարմնի կողմից:

1.7 Կուսակցության իրավաբանական հասցեն՝

ք. Երևան, Մամիկոնյանց 58, բն 42, հեռ՝ +374 91 20 77 96

2. Խնդիրներ ու նպատակներ

2.1  Աջակցել Իրավական, Ժողովրդավարական պետության կայացմանը:

2.2 Նպաստել ՀՀ-ում արդարության սկզբունքի արմատավորմանը, ժողովրդավարության ամրապնդմանը, խոսքի և խղճի ազատության ապահովմանը:

2.3 Համախմբել ՀՀ Քաղաքացիների ջանքերը՝ պաշտպանելու նրանց օրինական շահերն ու իրավունքները (այդ թվում օրենսդիր մարմնի միջոցով):

2.4 Օրենսդիր, գործադիր և դատական մարմինների միջոցով պայքարել հասարակության մեջ ծագող հարաբերությունների օրինական և արդարացի զարգացման համար:

2.5 Նպաստել երիտասարդության քաղաքական ակտիվությանը:

2.6 Ծրագրերի և միջոցառումների օգնությամբ նպաստել առկա խնդիրների ու պրոբլեմների վերհանմանն ու լուծմանը, մարդկանց ինքնադրսևորման ու կրթվածության մակարդակի բարձրացմանը:

3. Կուսակցության անդամները

3.1 Կուսակցության անդամ կարող են լինել ընտրական իրավունք ունեցող ՀՀ յուրաքանրյուր Քաղաքացի (բացառությամբ օրենքով նախատեսված դեպքերի), որն ընդունում է Կուսակցության կանոնադրությունը և ծրագիրը:

3.2 Կուսակցության անդամը չի կարող միաժամանակ այլ Կուսակցության անդամ լինել:

3.3 Անդամագրումը կատարվում է անհատական կարգով՝ անձնական դիմումի հիման վրա, այն տարածքային ստորաբաժանման կողմից, որտեղ մշտապես բնակվում է դիմողը:

3.4 Ընդունելության մասին տարածքային ստորաբաժանման որոշումը հաստատվում է Կուսակցության մշտապես գործող ղեկավար մարմնի կողմից առնվազն Կուսակցության երկու անդամների երաշխավորությամբ: