Հանուն Հզոր Հայքի

ՀԱՅՏԱՐԱՐՈՒԹՅՈՒՆ

Զարգացած պետության, արդար հասարակության ստեղծումն ու առաջընթացը մեր ժողովրդի բարգավաճման, ազգերի համաշխարհային հանրակցության մեջ իր արժանապատիվ տեղը զբաղեցնելու անհրաժեշտ նախադրյալն է:

Այս առումով ՀՀ ընտրական օրենսգրքի փոփոխումը հույժ կարևոր նշանակություն ունի:

Համոզված ենք, որ իրավական, ժողովրդավարական պետության կայացման գործում, պետական շինարարության առաջին անհրաժեշտ քայլերից մեկը ընտրությունների մասին այնպիսի օրենք ընդունելն է, որը ընտրական գործընթացի բոլոր փուլերում հուսալիորեն կփակի կեղծիքի, կաշառքի և ահաբեկության ճանապարհը:

Նպատակ ունենալով նպաստել արդար ընտրությունների կազմակերպման գործընթացին <<Արդարություն>> կուսակցությունը հայտարարում է Ընտրական օրենսգրքի փոփոխությունների քննարկմանը իր ակտիվ մասնակցության պատրաստակամության մասին և  ներկայացնում է իր առաջարկները՝

1. Կիրառել պարզ համամասնական ընտրակարգը փակ ցուցակներով:

Հիմնավորում – Խորհրդարանական կառավարման համակարգով երկրներում առավել կարևոր է Կուսակցությունների կայացումն ու զարգացումը: Ցանկացած այլ ընտրակարգի դեպքում բարձրանում է անհատների դերը, որը խանգարելու է Կուսակցությունների կայացմանը և զարգացմանը: 

2. Անցողիկ շեմը սահմանել 3%:

Հիմնավորում – Շատ կարևոր ենք համարում ընտրողների կամքի իրական արտահայտմամբ ԱԺ-ի ձևավորումը, հետևաբար որքան քիչ լինեն արհեստական արգելքները այնքան ավելի իրական պատկեր կստանանք արդյունքում: Սահմանադրական համապատասխան փոփոխություններից հետո հասնել <<անցողիկ շեմ>> հասկացության վերացմանը:

3. Ընտրությունների արդյունքում մինչև 3% ձայն հավաքած կուսակցություններին հնարավորություն ընձեռել միավորվել դաշինքներում և գումարային ձայների համամասնությամբ ներկայացված լինել ԱԺ-ում:

Հիմնավորում – Այս առաջարկը նույնպես կնպաստի Կուսակցությունների կայացմանը, ինչպես նաև ընտորողի ձայնի չփոշիացմանը:

4. Նախընտրական շրջանում արգելել թեկնածուի, կուսակցության կամ դրանց հետ փոխկապակցված անձանց կամ կառույցների բարեգործական նախաձեռնությունները կամ այդպիսի խոստումները:

Հիմնավորում – Ընտրակաշառքի թաքնված ձևերի բացառմանը նպաստելու համար:

5. Նախընտրական ծրագիրը ճանաչել որպես պաշտոնական փաստաթուղթ:

Հիմնավորում – Սահմանելով Նախընտրական ծրագրի հստակ ձևաչափ և պահանջներ՝ հնարավորություն կտանք ընտրողին առավել հստակ ընտրություն կատարել ծրագրերի միջև, այլ ոչ թե PR տեխնոլոգիաների միջոցով ենթարկվել մանիպուլյացիաների:

6. Ներդնել կուսակցությանը անվստահություն հայտնելու, պատգամավորին հետ կանչելու մեխանիզմ:

Հիմնավորում – Ծրագրից և խոստումներից էական շեղումների, քաղաքական նոր իրողությունների պայմաններում հնարավորություն ստեղծել առանց լուրջ ցնցումների ունենալ ՀՀ Քաղաքացու իրական կամքը արտահայտող Ազգային Ժողով:

7. Ընտրական բոլոր մակարդակի հանձնաժողովները ձևավորել ոչ կուսակցական սկզբունքով՝ ապահովելով ընտրության բոլոր մասնակիցների հավասարությունը:

Հիմնավորում – Հանձնաժողովները ձևավորելով Աժ-ում ներկայացված կուսակցությունների ներկայացուցիչներով՝ ստեղծում ենք անհավասար մրցակցային պայմաններ ընտրությունների մասնակից մյուս կուսակցությունների համար:

8. Սահմանել ԱԺ նիստերից բացակայությունների դեպքում օրենքի ուժով պատգամավորի լիազորությունների դադարեցման ընթացակարգ՝ անկախ բացակայության պատճառներից (բացառությամբ պատգամավորի գործունեության հետ կապված գործուղումների):

Հիմնավորում – Բացառել բոլոր այն անձանց ներկայությունը ԱԺ-ում, որոնք չեն զբաղվում օրենսդիր քաղաքական գործունեությամբ:

9. Օրենքով սահմանափակել պատգամավորի և նրա հետ փոխկապակցված անձանց պատկանող ընկերությունների մասնակցության չափը պետական գնումների գործընթացին:

Հիմնավորում – Բացառել բոլոր այն անձանց ներկայությունը ԱԺ-ում, ովքեր նպատակ ունեն պատգամավորի մանդատը օգտագործել տնտեսական առավելություններ ստանալու նպատակով: